इटहरी । कृष्ण जन्माष्टमी नजिकिँदै गर्दा इटहरीस्थित कृष्ण प्रणामी मन्दिरमा पर्वको रौनक बढेको छ। मन्दिर परिसरमा विभिन्न विद्यालयका बालबालिकाहरूलाई राधा–कृष्णको भेषमा सजाएर धार्मिक तथा सांस्कृतिक गतिविधि सञ्चालन भइरहेका छन्।
जन्माष्टमीको अवसर पारेर विभिन्न विद्यालयका शिक्षक तथा अभिभावकहरूले बालबालिकाहरूलाई राधा र कृष्णको भेषमा सजाई मन्दिरमा दर्शन गराउन ल्याउने गरेका छन्। रंगीचंगी पोशाकमा सजिएका बालबालिकाहरूको उपस्थितिले मन्दिर परिसर थप आकर्षक र उल्लासमय बनेको छ।
बालबालिकाहरूले राधा–कृष्णको स्वरूपमा मन्दिरमा पूजा–दर्शन गर्नुका साथै विभिन्न धार्मिक तथा सांस्कृतिक गतिविधिमा सहभागी भइरहेका छन्। कृष्ण जन्माष्टमीको अवसरमा मन्दिरमा भक्तजनहरूको चहलपहल समेत बढ्दै गएको छ।
बालबालिकालाई भगवान् श्रीकृष्णको बालरूपसँग परिचित गराउँदै धार्मिक, सांस्कृतिक तथा मौलिक परम्पराको संरक्षण र पुस्तान्तरण गर्ने उद्देश्यले विद्यालय तथा अभिभावकहरूले यस्ता गतिविधिमा बालबालिकालाई सहभागी गराइरहेका छन्।
जन्माष्टमीको मुख्य दिन नजिकिँदै जाँदा कृष्ण प्रणामी मन्दिरमा थप भक्तजनको आगमन हुने र विभिन्न धार्मिक कार्यक्रम तथा पूजाआजासहित पर्व मनाउने तयारी भइरहेको छ। अहिले नै राधा–कृष्णको भेषमा सजिएका बालबालिका र भक्तजनको चहलपहलले मन्दिर परिसरमा जन्माष्टमीको उल्लास छाएको छ।
