इटहरी । सुनसरीको इटहरी स्थित दुर्गा पार्टी प्यालेसमा युवाहरूको ऊर्जा, क्षमता, आत्मविश्वास तथा नेतृत्व विकासलाई सही दिशामा परिचालन गर्ने उद्देश्यसहित आयोजित “तेस्रो जोनल फिएस्टा २०२६” अन्तर्गतको विशेष प्यानल छलफल कार्यक्रम उत्साहजनक रूपमा सम्पन्न भएको छ। कार्यक्रममा शिक्षा, सञ्चार, व्यक्तित्व विकास, नेतृत्व तथा सामाजिक क्षेत्रमा सक्रिय र अनुभवी व्यक्तित्वहरूको सहभागिताले कार्यक्रमलाई थप प्रभावकारी बनाएको थियो।
युवापुस्तालाई प्रेरणा दिने उद्देश्यले विभिन्न क्षेत्रका विज्ञ, प्रशिक्षक तथा सफल व्यक्तित्वलाई प्यानलिस्टका रूपमा आमन्त्रण गरिएको आयोजकले जनाएको छ। कार्यक्रममा सहभागी वक्ताहरूले युवाहरूमा बढ्दो निराशा, बेरोजगारी, मानसिक दबाब तथा विदेश पलायनजस्ता चुनौतीबीच सकारात्मक सोच, आत्मविश्वास र नेतृत्व क्षमताको विकास आवश्यक रहेको बताएका थिए।
कार्यक्रममा विराट टेलिभिजनका अंग्रेजी समाचार प्रस्तोता, प्रमाणित नेतृत्व प्रशिक्षक तथा मनो–सामाजिक परामर्शदाता रोटर्याक्टर मौसम कोइरालाको विशेष सहभागिता रहेको थियो। लामो समयदेखि विभिन्न सामाजिक संघसंस्थामा आबद्ध रहँदै आएका उनले युवाहरूको मानसिक स्वास्थ्य, आत्मविश्वास तथा नेतृत्व विकासका विषयमा आफ्नो अनुभव साझा गरेका थिए। उनले युवाहरूलाई आफ्नो लक्ष्यप्रति स्पष्ट भई सकारात्मक सोचका साथ अघि बढ्न आग्रह गर्दै मानसिक रूपमा सबल बन्न सके जीवनका चुनौती सहज रूपमा सामना गर्न सकिने बताएका थिए। सञ्चार तथा परामर्श क्षेत्रमा रहेको उनको अनुभवले कार्यक्रममा सहभागी युवाहरूलाई प्रेरणा र मार्गदर्शन प्रदान गरेको सहभागीहरूले बताएका छन्।
त्यसैगरी, शिक्षा क्षेत्रमा लामो समयदेखि योगदान पुर्याउँदै आएका रोटेरियन केशवप्रसाद भट्टराई पनि कार्यक्रममा विशेष प्यानलिस्टका रूपमा सहभागी थिए। हाल पीस जोन स्कुलका प्रधानाध्यापक तथा नेल्टाका सदस्यता सचिव रहेका उनले आधुनिक शिक्षामा प्रविधिको प्रयोग, व्यवहारिक ज्ञान तथा आत्मनिर्भर शिक्षाको आवश्यकता बारे धारणा राखेका थिए। उनले विद्यार्थीहरूलाई भविष्यमा आत्मनिर्भर बनाउन शिक्षा प्रणालीलाई समयअनुसार परिमार्जन गर्नुपर्ने आवश्यकता औंल्याउँदै नयाँ–नयाँ प्रविधिको प्रयोगमार्फत विद्यार्थीलाई देशमै अवसर सिर्जना गर्न सकिने बताएका थिए। साथै, पढाइ वा रोजगारीका लागि विदेश जानुपर्ने बाध्यता कम गर्न व्यावहारिक र सीपमूलक शिक्षामा जोड दिनुपर्ने उनको भनाइ थियो।
कार्यक्रममा बीपी कोइराला स्वास्थ्य विज्ञान प्रतिष्ठानकी प्राध्यापक तथा डिन डा. अञ्जु प्रधानको पनि विशेष सहभागिता रहेको थियो। उनी टोस्टमास्टर्स र रोटरी अभियानमा समेत सक्रिय रहँदै आएकी छन्। कार्यक्रममा बोल्दै उनले प्रभावकारी सञ्चार कला, व्यक्तित्व विकास तथा नेतृत्व क्षमताले युवालाई सफलताको मार्गमा अघि बढाउन महत्वपूर्ण भूमिका खेल्ने बताइन्। उनले युवाहरूलाई आफ्नो क्षमता पहिचान गरी समाज परिवर्तनमा सक्रिय भूमिका खेल्न प्रेरित गरेकी थिइन्।
आयोजकका अनुसार कार्यक्रममा युवाहरूको क्षमता पहिचान, नेतृत्व विकास, मानसिक स्वास्थ्य, सकारात्मक सोच, सामाजिक उत्तरदायित्व तथा समाज परिवर्तनमा युवाको भूमिकाबारे विस्तृत छलफल गरिएको थियो। वक्ताहरूले युवालाई केवल शैक्षिक ज्ञानमा सीमित नराखी व्यवहारिक सीप, नेतृत्व क्षमता र सामाजिक उत्तरदायित्वतर्फ उन्मुख गराउन आवश्यक रहेको बताएका थिए।
कार्यक्रममा सहभागी विद्यार्थी, युवा, शिक्षक, सामाजिक अभियन्ता तथा विभिन्न क्षेत्रका व्यक्तिहरूले प्यानलिस्टसँग प्रत्यक्ष संवाद गर्ने अवसर पाएका थिए। सहभागीहरूले कार्यक्रममार्फत व्यावहारिक ज्ञान, प्रेरणा तथा अनुभव हासिल भएको प्रतिक्रिया दिएका छन्।
“तेस्रो जोनल फिएस्टा २०२६” अन्तर्गत आयोजना गरिएको यो विशेष प्यानल छलफल कार्यक्रम युवाहरूका लागि प्रेरणादायी, ज्ञानवर्द्धक तथा नेतृत्व विकासमा महत्वपूर्ण बन्ने आयोजकको विश्वास रहेको छ। कार्यक्रमले युवाहरूलाई आफ्नो क्षमता पहिचान गरी समाज र राष्ट्र निर्माणमा सक्रिय भूमिका निर्वाह गर्न प्रेरित गर्ने अपेक्षा गरिएको छ ।
