सर्लाही । मधेश प्रदेशको सर्लाही क्षेत्र नम्बर ४ मा यसपटकको निर्वाचनले राष्ट्रिय राजनीतिलाई नै चासोको केन्द्र बनायो। नेपाली कांग्रेसका सभापति गगन थापा र राष्ट्रिय स्वतन्त्र पार्टीका उम्मेदवार अमरेश कुमार सिंह बीचको प्रतिस्पर्धालाई देशभरले नजिकबाट हेरिरहेको थियो।
अन्ततः सार्वजनिक मतपरिणाम अनुसार अमरेश सिंहले ३५ हजार ६८८ मत प्राप्त गर्दै गगन थापालाई १२ हजार ८५७ मतको फराकिलो अन्तरले पराजित गरे। थापाले २२ हजार ८३१ मत मात्र प्राप्त गर्न सके।
गगन थापा यसअघि काठमाडौंबाट लगातार तीन पटक निर्वाचित भएका नेता हुन्। यसपटक भने उनले पहिलोपटक मधेश प्रदेशको सर्लाहीबाट चुनाव लड्ने निर्णय गरेका थिए। तर स्थानीय मतदाताले भने आफ्नो क्षेत्रसँग प्रत्यक्ष सम्बन्ध भएका नेतालाई प्राथमिकता दिएका देखिन्छ।
अमरेश सिंह यस क्षेत्रका पुराना र स्थानीय मुद्दामा सक्रिय नेता मानिन्छन्। यसअघि पनि स्वतन्त्र उम्मेदवारका रूपमा यही क्षेत्रबाट विजयी भएका उनी यसपटक राष्ट्रिय स्वतन्त्र पार्टीबाट चुनावी मैदानमा थिए।
सर्लाहीका धेरै मतदाताले यो परिणामलाई केवल चुनावी जित मात्र नभई “परिवर्तनको संकेत” का रूपमा व्याख्या गरेका छन्। स्थानीय जनताको अपेक्षा अनुसार अब सडक, शिक्षा, स्वास्थ्य, रोजगारी र विकासका काममा गति आउने विश्वास गरिएको छ।
स्थानीय बासिन्दाहरू भन्छन्— “अब सर्लाहीको मुहार फेरिने आशा छ। विकासका कामहरू अघि बढोस् भन्ने चाहना छ।”
यसरी सर्लाही–४ को निर्वाचन परिणामले मधेश प्रदेशमा नयाँ राजनीतिक सन्देश दिएको छ। जनताले अब केवल ठूला नाम होइन, आफ्नो क्षेत्रका समस्या बुझ्ने र समाधान गर्ने नेताको खोजी गरिरहेको स्पष्ट देखिएको छ।
