इटहरी । इटहरी उद्योग वाणिज्य संघको शनिबार हुने निर्वाचनअघि सार्वजनिक गरिएको एक प्रारम्भिक मत सर्वेक्षणले अध्यक्ष पदकी स्वतन्त्र उम्मेदवार गायत्री कटुवाल भण्डारी अग्रस्थानमा रहेको दाबी गरेको छ। यद्यपि, उक्त सर्वेक्षणको स्वतन्त्र पुष्टि भने हुन सकेको छैन।
सर्वेक्षण सञ्चालन गरिएको दाबी गर्ने पक्षका अनुसार व्यवसायीहरूमाझ गोप्य रूपमा गरिएको मत अध्ययनमा अध्यक्ष पदका लागि भण्डारीप्रति उल्लेख्य समर्थन देखिएको छ। सहभागी अधिकांश व्यवसायीले उनलाई मतदान गर्ने मनसाय व्यक्त गरेको र विभिन्न राजनीतिक आस्थासँग आबद्ध व्यवसायीहरूको समेत समर्थन प्राप्त हुन सक्ने दाबी गरिएको छ।
सर्वेक्षणमा अध्यक्ष पदबाहेक अन्य पदहरूमा भने प्रतिस्पर्धा निकै कडा रहने र मिश्रित नतिजा आउने अनुमान गरिएको छ। इटहरी उपमहानगरपालिकाका विभिन्न वडाका मुख्य बजार क्षेत्रमा गरिएको भनिएको अध्ययनमा धेरै व्यवसायीले यसपटक नेतृत्व परिवर्तनको पक्षमा मत दिने मनस्थिति बनाएको उल्लेख गरिएको छ। उद्योग वाणिज्य संघलाई सीमित समूह वा व्यक्तिको प्रभावबाट मुक्त गरी सम्पूर्ण व्यवसायीको साझा संस्थाका रूपमा अघि बढाउनुपर्ने धारणा बलियो बन्दै गएको निष्कर्ष पनि सर्वेक्षणले निकालेको दाबी गरिएको छ।
सर्वेक्षणका क्रममा केही व्यवसायीले सार्वजनिक रूपमा साझा समूहका उम्मेदवारलाई समर्थन गरे पनि गोप्य मतदानमा भने स्वतन्त्र उम्मेदवार गायत्री कटुवाल भण्डारीलाई मत दिने वातावरण रहेको दाबी गरिएको छ। अध्यक्ष पदसँगै केही सदस्य पदमा पनि स्वतन्त्र समूहका उम्मेदवारलाई मतदान गर्नुपर्ने सन्देश सामाजिक सञ्जालमार्फत आदान–प्रदान भइरहेको दाबी गरिएको भए पनि यसको स्वतन्त्र पुष्टि भएको छैन।
साझा समूह निकट एक व्यवसायीलाई उद्धृत गर्दै सर्वेक्षणमा भण्डारीले अध्यक्ष पदमा करिब १५० देखि २६० मतसम्मको अन्तरले विजय हासिल गर्न सक्ने अनुमान गरिएको उल्लेख छ। उनका अनुसार केही व्यवसायी सार्वजनिक रूपमा अर्का उम्मेदवारको पक्षमा देखिए पनि गोप्य मतदानमा फरक निर्णय गर्न सक्ने अवस्था रहेको दाबी गरिएको छ।
सर्वेक्षणले करिब २ हजार ३ सयभन्दा बढी मतदाता रहेको निर्वाचनमा १ हजार ७ सय ५० हाराहारी मत खस्ने अनुमान गरेको छ। केही मत बदर हुन सक्ने आकलनसहित करिब ८ सय मत प्राप्त गर्ने उम्मेदवार अध्यक्षमा निर्वाचित हुन सक्ने उल्लेख गरिएको छ। सो मतसंख्याभन्दा बढी मत प्राप्त गर्ने सम्भावना भण्डारीको पक्षमा रहेको दाबी पनि सर्वेक्षणमा गरिएको छ।
यद्यपि, निर्वाचनको वास्तविक परिणाम मतदान र मतगणनापछि मात्र औपचारिक रूपमा सार्वजनिक हुनेछ। यदि सर्वेक्षणको अनुमानअनुसार परिणाम आएमा गायत्री कटुवाल भण्डारी इटहरी उद्योग वाणिज्य संघको पहिलो निर्वाचित महिला अध्यक्ष बन्नेछिन्।
निर्वाचन समितिका अनुसार उद्योग वाणिज्य संघ इटहरीको निर्वाचनअन्तर्गत मतदान शनिबार बिहान ९ बजेदेखि इटहरी–५ स्थित ज्योति माध्यमिक विद्यालयमा हुनेछ।
