काठमाडौं । राजा ज्ञानेन्द्र शाहले देशको अभिभावकीय भूमिका निर्वाह गर्न आफु तयार रहेको भन्दै आफुलाई साथ दिन देशवासीलालाई आह्वान गर्नुभएको छ ।
७५ औं राष्ट्रिय प्रजातन्त्र दिवसको अवसरमा शुभकामना संदेश दिनुहुँदै राजा शाहले राष्ट्रिय एकता कायम राख्न, देशको समृद्धि र उन्नतिकालागि आफुले जुनसुकै त्याग गर्न समेत तयार रहेको र त्यसका लागि आफुलाई साथ दिन सबै देशवासीहरुलाई आह्वान गर्नुभएको हो । उहाँले देशका निम्ति र राष्ट्रका खातिर आफ्नो समर्पण, निष्ठा सदैव हुनेछ भन्दै हव देश जोगाउने बेला आएको र देश जोगउन राजा जनता एक हुनुपर्ने धारणा समेत राख्नु भएको छ ।
उहाँले राष्ट्रको हितमा आफुले उदारता देखाएको, जनताको भलो होस भनेर आफ्नो ओहदा र सुख सुविधालाई समेत त्याग गरेको स्मरण समेत गराउनु भएको छ । उहाँले भन्नु भएको छ, "त्यागले कसैको कद सानो हुने होइन, र त्यस्तो भावलाई कसैले पनि कमजोरी ठान्नु हुँदैन। कतै कुनै पनि पक्ष नगरी सबैलाई समेटेर जाने हाम्रो अभिलाषा हो। हाम्रो त्यागको अर्थ र आसय पनि त्यही नै हो। हाम्रो इतिहासलाई नास गरेर र पहिचानको अपमान गरेर हामी उभो लाग्दैनौ भन्ने कुराको हेक्का राखेर हामी अघि बढौं । विगतका कमीकमजोरी तथा आफ्नो प्रकृति र संस्कृति विरुद्धका त्रुटी सच्चाएर अघि बढ्ने चेतना हामीलाई प्राप्त होस ।,"
उहाँले वर्तमान अवस्थाका कारण देश डामाडोलको अवस्थामा पुगेको र देशको इतिहासनै मेटिदै गएको भन्दै अब देशको अस्तित्व जोगाउनुपर्ने बेला आएको बताउनुभयो । उहाँले भन्नुभयो, "आज देशको इतिहास मेटिदै गएको छ । नेपालको अस्तित्व नासिदै गएको छ। नेपालका होनहार जनशक्ति दिनहुँ ताँती लागेर देशवाट बाहिरिदै गएका छन् । नेपालीको पसिना आफ्नो माटोमा होइन, अन्तै पोखिरहेको छ । जन्मदै नेपालीको शिरमा हजार होइन लाखको ऋणभारको बोझ छ। हाम्रा कलकारखाना, व्यापार व्यवसाय निरन्तर धरासायी बन्दै छ । हुँदा हुँदा हाम्रा शिक्षालयहरुमा समेत शिक्षक र विद्यार्थीहरु पातलिदै गएका छन् । नेपालको पद्धति, नीति र गतिविधी ठीक छैन, यहाँ बसेर केही हुँदैन । श्रम, शीप चेतना र ज्ञान भएका हाम्रा नागरिकहरुमा त्यस प्रकारको भाष्य चलि रहेको छ । यस्ता कुराले प्रजातन्त्रलाई शोभनीय बनाउँदैन ।,"
प्रजातन्त्र भनेको आसा जगाउने प्रणाली, जनताको भरोसा बढाउने प्रणाली हुनुपर्ने धारणा राख्दै उहाँले भन्नुभयो, प्रजातन्त्र फल्दै फुल्दै जाँदा हामी सबैको भाग्य र भविष्य चम्कन्छ । व्यवस्था बदलियो भन्नेहरुले अवस्था राम्ररी बदल्न नसक्नु दुःखको कुरा भएको उहाँको धारणा छ ।
हेर्नुस उहाँले दिनुभएको संदेश जस्ताको त्यस्तै
