मोरङ । मोरङको सुन्दरहरैंचामा राष्ट्रिय कलाकारहरुको सहभागितामा सिद्धार्थ सांगीतिक कार्यक्रम आयोजना हुने भएको छ ।
सुन्दरहरैंचा ६ स्थित सिद्धार्थ युवा क्लवको आयोजनामा यही कात्तिक २९ गते हुने कार्यक्रमको बारेमा शुक्रबार पत्रकार सम्मेलन गरि जानकारी दिइएको हो । पत्रकार सम्मेलनमा बोल्दै सुन्दरहरैंचा ६ का वडासदस्य तथा कार्यक्रम संयोजक डम्बर थापामगरले तिहार छठ लगायतका पर्वहरुको अवसर पारेर स्थानीयबासीलाई मनोरञ्जन प्रदान गर्ने उद्देश्यले कार्यक्रम आयोजना गरेको जानकारी दिए ।
बिहान ११ बजेदेखि सुरु हुने कार्यक्रममा अपरान्ह ४ बजेसम्म खुल्ला नृत्य प्रतियोगिता सञ्चालन हुने छ ।
जसमा नेपाली लोक सँस्कृति झल्कने गीतमा स्थानिय कलाकारहरुको सामुहिक नृत्यहरु बीच प्रतिस्पर्धा गराइने जनाइएको छ ।
यसैगरि साँझ ६ बजेदेखि हुने साँस्कृतिक कार्यक्रममा चर्चित हाँस्य श्रृंखला सक्किगोनीका मुख्य पात्रहरु अर्जुन घिमिरे पाँडे र कुमार कट्टेल जीग्रिको हाँस्य प्रस्तुती रहने छ भने चर्चित गायिका एलिना चौहान र स्थानीय कलाकारहरुको गीत तथा नृत्यहरुको प्रस्तुति समेत रहने आयोजकले जानकारी दिएको छ ।
वर्षेनी कार्यक्रम आयोजना गर्ने गरेकोमा कोरोना महामारीका कारण निकै लामो समय यस्ता कार्यक्रमहरु सञ्चालन नभएको अवस्थामा हाल कोरोना संक्रमण निकै कम भएकाले कोरोनाको त्रास भुलाइ विशुद्ध मनोरञ्जन दिलाउने उद्देश्यले कार्यक्रम आयोजना गरिएको संयोजक थापामगरले जानकारी दिए ।
कार्यक्रममा सुन्दरहरैंचा, इटहरी, केराबारी लगायत क्षेत्रका गरि ७ हजार भन्दा बढी दर्शकको सहभागित हुने आयोजकको अपेक्षा रहेको छ ।
