इटहरी । नेपाली मौलिक सङ्गीतका पारखीका लागि पूर्वी नेपालको इटहरीमा यसपटक विशेष सांगीतिक माहोल बन्ने भएको छ। लोकप्रिय ब्यान्ड नेपथ्य पहिलोपटक इटहरीमा प्रत्यक्ष प्रस्तुत हुन लागेको हो। लामो समयदेखि रेडियो, टेलिभिजन र डिजिटल माध्यममा नेपथ्यका गीत सुन्दै आएका दर्शकले अब आफ्नै सहरमा ब्यान्डलाई प्रत्यक्ष हेर्न पाउने भएका छन्।
कात्तिक १८ गते इटहरी रङ्गशालामा आयोजना हुने कन्सर्टप्रति दर्शकको चासो बढ्दै गएको छ। तर, यो कार्यक्रम केवल नेपथ्यको पहिलो इटहरी प्रस्तुति मात्र नभई सम्भवतः अन्तिम पनि हुन सक्ने आयोजकको भनाइले थप चर्चा पाएको छ।
पूर्वाञ्चल इभेन्ट्स प्रालिको आयोजनामा तथा इटहरी उपमहानगरपालिकाको प्रवर्द्धनमा हुन लागेको कार्यक्रममा अहिलेसम्म करिब तीन हजार टिकट बिक्री भइसकेको आयोजकले जनाएको छ। करिब १० हजार दर्शक अट्ने क्षमताअनुसार रङ्गशालामा व्यवस्थापनको तयारी गरिएको छ।
आयोजक संस्थाका अध्यक्ष राजकुमार कार्कीका अनुसार नेपथ्यको टोलीसँग भएको कुराकानीमा भविष्यमा इटहरीमा पुनः प्रस्तुति नहुन सक्ने सम्भावनासमेत व्यक्त भएको थियो। यही कारण पहिलोपटक हुन लागेको कन्सर्ट विशेष बन्न सक्ने उनको भनाइ छ। यद्यपि, इटहरीमा फेरि कार्यक्रम नहुने विषयमा ब्यान्डले औपचारिक निर्णय सार्वजनिक गरेको छैन।
कार्यक्रमको तयारी अन्तिम चरणमा पुगेको आयोजकले जनाएको छ। अक्टोबर ३० देखि मञ्च निर्माण सुरु गर्ने योजना रहेको छ। टिकट अनलाइन तथा प्रत्यक्ष बिक्री केन्द्रबाट उपलब्ध गराइएको छ भने सीमित सङ्ख्यामा मात्र टिकट बाँकी रहेको आयोजकको दाबी छ।
नेपथ्यको आधिकारिक कार्यतालिकाअनुसार कार्यक्रमका दिन अपराह्न ४ बजे दर्शकका लागि प्रवेशद्वार खुल्नेछ। सांगीतिक प्रस्तुति भने साँझ ६ बजे सुरु हुनेछ।
तीन दशकभन्दा लामो समयदेखि नेपाली सङ्गीत क्षेत्रमा सक्रिय नेपथ्यले लोकभाका र आधुनिक वाद्यवादनको संयोजनमार्फत आफ्नै सांगीतिक पहिचान बनाएको छ। सन् १९९० मा दीपक राना, भीम पुन र अमृत गुरुङले स्थापना गरेको ब्यान्डलाई मुख्य गायक अमृत गुरुङले निरन्तर नेतृत्व गर्दै आएका छन्।
‘छेक्यो छेक्यो’, ‘जोमसोमे बजारमा’, ‘रेशम’ र ‘भेडाको ऊनजस्तो’ लगायतका गीत नेपथ्यका चर्चित सिर्जना हुन्। नेपाली समाज, गाउँबस्ती, संस्कृति, प्रेम, पीडा र आशाका अनुभूतिलाई समेट्ने ब्यान्डका गीतले विभिन्न पुस्ताका श्रोतामाझ लोकप्रियता कमाएका छन्।
नेपथ्यका गीत सुनेर हुर्किएका सङ्गीतप्रेमीका लागि प्रत्यक्ष कन्सर्ट हेर्न पाउनु विशेष अवसरका रूपमा रहनेछ। त्यसमा पनि इटहरीमा पहिलोपटक हुन लागेको प्रस्तुति भविष्यमा दोहोरिने निश्चित नभएकाले यस कार्यक्रमले पूर्वका दर्शकलाई आकर्षित गर्ने अपेक्षा गरिएको छ।
