इटहरी। उज्यालो नेपाल आपगाछिको आयोजनामा इटहरी–२, आपगाछिमा दशैं–तिहार विशेष सांस्कृतिक कार्यक्रम आयोजना गरिएको छ। रियलिटी क्रु नेपाल एन्ड डान्स सेन्टर (REALITY CREW NEPAL AND DANCE CENTER) मा आयोजित उक्त कार्यक्रममा नेपाली मौलिक कला, संस्कृति, परम्परा तथा चाडपर्वको संरक्षण र प्रवर्द्धनमा जोड दिइएको थियो।
कार्यक्रमका प्रमुख अतिथि इटहरी उपमहानगरपालिका वडा नम्बर १ का वडाध्यक्ष रतन कार्की (कैलाश) ले नेपाली मौलिक संस्कार र संस्कृतिको संरक्षण गर्नु सबैको साझा दायित्व भएको बताउनुभयो। उहाँले नेपाली समाजको पहिचानका रूपमा रहेका दशैं र तिहारजस्ता महान् चाडपर्वलाई आपसी सद्भाव, भाइचारा, एकता र हर्षोल्लासका साथ मनाउन आग्रह गर्नुभयो। यस्ता सांस्कृतिक कार्यक्रमले समाजमा सकारात्मक सन्देश प्रवाह गर्नुका साथै मौलिक परम्परालाई जीवन्त राख्न महत्वपूर्ण भूमिका खेल्ने उहाँको भनाइ थियो।
कार्यक्रममा विशिष्ट अतिथिका रूपमा नेपाली कांग्रेस इटहरी उपमहानगर सभापति विकास केसीको उपस्थिति रहेको थियो। कार्यक्रममा विभिन्न सामाजिक तथा राजनीतिक व्यक्तित्व, समाजसेवी, स्थानीयवासी र कला–संस्कृतिप्रेमीहरूको सहभागिता रहेको थियो। सहभागीहरूले नेपाली मौलिक संस्कृति र परम्पराको जगेर्ना गर्न यस्ता कार्यक्रमलाई निरन्तरता दिनुपर्नेमा जोड दिएका थिए।
रियलिटी क्रु नेपाल एन्ड डान्स सेन्टरका अध्यक्ष निश्चल पराजुलीको अध्यक्षतामा सम्पन्न कार्यक्रमको संयोजन आशिष चौधरीले गर्नुभएको थियो। कार्यक्रममार्फत स्थानीय प्रतिभालाई प्रोत्साहन गर्नुका साथै नयाँ पुस्तालाई नेपाली संस्कृति, संस्कार र परम्परासँग जोड्ने प्रयास गरिएको आयोजकको उद्देश्य रहेको छ।
नेपाली समाजमा दशैं र तिहार धार्मिक तथा सांस्कृतिक महत्व बोकेका प्रमुख पर्वका रूपमा रहेका छन्। यी पर्वले पारिवारिक पुनर्मिलन, आपसी प्रेम, सद्भाव र सामाजिक एकतालाई बलियो बनाउने विश्वास गरिन्छ। यसै सन्दर्भमा आयोजित सांस्कृतिक कार्यक्रमले स्थानीय स्तरमा कला र संस्कृतिको संरक्षण गर्दै नयाँ पुस्तामा मौलिक परम्पराप्रतिको आकर्षण बढाउन सहयोग पुग्ने अपेक्षा गरिएको छ।
स्थानीय कला, संस्कृति र परम्पराको संरक्षणसँगै सामाजिक सद्भाव तथा एकताको सन्देश प्रवाह गर्ने उद्देश्यले आयोजित कार्यक्रमले समुदायमा सांस्कृतिक चेतना अभिवृद्धि गर्न महत्वपूर्ण योगदान पुर्याउने विश्वास आयोजकले लिएका छन्।
