धनकुटा । प्रतिनिधि सभा र प्रदेश सभा सदस्य निर्वाचनको मिति आउन ९ दिनमात्र बाँकी रहँदा उम्मेदवारहरु घरदैलोमा व्यस्त छन् । मतदाताहरु पनि उम्मेदवारहरुको समीक्षा गर्दै मत दिने तरखरमा छन् ।
धनकुटाका मतदाताको माग पुरानै छ– खानेपानी, स्वास्थ्य र सडकको सुविधा । बहुदलीय व्यवस्था सुरु भएपछि भएको पहिलो निर्वाचनदेखि नै धनकुटेलीको माग यही छ ।
धनकुटा नगरपालिका वडा नं. ७ तोमुवाकी रिना लिम्बुले मत माग्दै आएका उमेद्वारसँग गाउँमा राम्रो सडकको माग गरिन् । सडकसँगै उनको जोड खानेपानी र स्वास्थ्यमा समेत थियो । गाउँमा खानेपानी, सडक र स्वास्थ्यकै समस्या रहेको तमुवाकै दुखलाल राई पनि बताउँछन् ।
धनकुटाको महालक्ष्मी नगरपालिका वडा नं. ९ का सन्तोष बानियाँले सडक सुधार, गाउँमै गुणस्तरीय शिक्षा, सुलभ स्वास्थ्य सेवाको माग रहेको बताए । उनले हरेक पटक यस्तै माग गरे पनि मागपत्र वा नेताका प्रतिबद्धतामा मात्रै सीमित हुने गरेको गुनासो गरे ।
२०४८ सालको प्रतिनिधिसभा निर्वाचन होस् वा २०४९ को स्थानीय तहको निर्वाचन होस् वा त्योभन्दा पछिका निर्वाचनमा समेत उनीहरुको माग सडक, स्वास्थ्य, खानेपानी नै हुने गरेको छ । राजनीतिक दलका घोषणा पत्र भने स्वास्थ्य, शिक्षा, पूर्वाधारबाट पनि धेरै अघि बढेर अन्य महत्वकांक्षी योजनातर्फ लम्किसकेका छन् ।
दलले मत तान्न एकभन्दा बढी विषय समावेश गर्ने भएकाले ग्रामीण क्षेत्रका बासिन्दाको माग र दलहरुको घोषणा पत्र बिच तालमेल नखाने धनकुटा बहुमुखी क्याम्पस धनकुटाका उपप्राध्यापक दिनेश अधिकारी बताउँछन् ।
सामाजिक अभियन्ताहरुको अनुभव भने फरक छ । ग्रामीण क्षेत्रका बासिन्दाले पूर्वाधारको मागसँगै आर्थिक आयआर्जन लगायत अन्य पाटोलाई भुल्ने गरेको तथा राजनीतिक दलले समेत आयआर्जनको पाटोलाई प्राथमिकतामा नराख्ने गरेको बुझाइ उनीहरुको छ ।
मतदाता र घोषणापत्रमा राजनितिक दलले आय आर्जनलाई पहिलो प्राथमिकता दिनुपर्नेमा त्यसो गरेको नपाएको कृषि तथा सामाजिक अभियन्ता जीवन राईले गुनासो गरे ।
प्रतिनिधि सभामा एक क्षेत्र रहेको धनकुटामा यो पटक सत्ता गठबन्धनबाट कांग्रेसका सुनिलबहादुर थापा, नेकपा एमालेबाट राजेन्द्र राई तथा एकीकृत नेकपा माओवादी परित्या गरेका स्वतन्त्र हेमराज भण्डारी सहित ७ जना उम्मेदवार चुनावी मैदानमा छन् ।
