भ्रम फैलाएकोमा काँग्रेस प्रदेश नं. १ को संसदीय दलको ध्यानाकर्षण

इटहरी । प्रदेश नं. १ का मुख्यमन्त्री शेरधन राईविरुद्धको अविश्वास प्रस्ताव टेबल हुने आइतबारको संसद् बैठक रोक्न कांग्रेस सभापति शेरबहादुर देउवाको दबाब आएको भनी केही सञ्चार माध्यममा आएको समाचारप्रति प्रदेश नं. १ काँग्रेस संसदीय दलले गम्भीर ध्यानाकर्षण भएको जनाएको छ। संसदीय दलका नेता राजीव कोइरालाले केही सञ्चारमाध्यमले अनाश्यक भ्रम सिर्जना गर्नका लागि समाचार प्रकासन÷प्रसारण गरेकोमा गम्भीर ध्यानाकर्षण भएको जनाउँदै त्यसमा सत्यता नभएको प्रस्ट पारेका छन् । उनले अविश्वास प्रस्ताव पेस भएपछि त्यसलाईं टेवल गरि टुंगो लगाउनुपर्नेमा शुरुवातदेखि नै काँग्रेसको अडान रहदै आएको प्रस्ट्याए । ‘केही समयअघिदेखि सत्तापक्षीय नै संसद अबरोध गरेर बसेका थिए । यस्तो इतिहासमा कही हुँदैन,’ संसदीय दलका नेता कोइरालाले भने, ‘अब अविश्वासको प्रस्ताव टेवल भएको छ । यो प्रदेशले गति लिनेछ ।’ नेता कोइरालाले प्रदेशसभामा अब कुन समुहसँग मिलेर अघि बढ्ने भनेर केन्द्रले सही टुंगो लगाउनुपर्ने बताए । ‘यदि केन्द्रले सही टुंगो नलगाएमा प्रदेशलाई आफै निर्णय गर्ने अधिकर दिनुपर्छ,’ उनले भने, ‘प्रदेशले सुझबुझका साथ निर्णय लिन्छ ।’ प्रदेश नं. १ मा पुस १२ गते नै प्रदेशसभामा दर्ता भएको मुख्यमन्त्री शेरधन राईविरुद्धको अविश्वासको प्रस्ताव आइतबार मात्र टेबल भएको हो ।