झापा । राष्ट्रिय प्रजातन्त्र पार्टीका नेता राजेन्द्र लिङदेनले पृथ्वीनारायण शाहले एकीकृत नेपाल नबनाएको भए नेपाल नभइ यतिबेलासम्ममा भारतको एउटा प्रान्त भइसक्ने बताएका छन्। झापामा आयोजित २९९ औं पृथ्वीजयन्ती तथा राष्ट्रिय एकता दिवस समारोहमा बोल्दै नेता लिङदेनले राष्ट्र निर्माता पृथ्वीनारायण शाहले एकीकरण गरेकैले अहिले ‘नेपाल’ देश बनेको उल्लेख गर्दै सरकारले राष्ट्र एकता दिवस मनाउने विषयमा कन्जुस्याईं गर्न नहुने बताएका हुन्। कतिपय जातीय संस्थाहरूले राष्ट्र निर्माता पृथ्वीनारायण शाहमाथि उठाइएका प्रश्नहरूको खण्डन गर्दै नेता लिङदेनले भने, ‘अहिलेसम्म न लिम्बुवान न खम्बुवान न अन्य कुनै ‘वान’ रहन्थ्यो। पृथ्वीनारायण शाहले एकीकरण नगरेको भए यो भारतको प्रान्त बनिसक्थ्यो।‘ नेता लिङ्गदेनले भने । पृथ्वी जयन्ती तथा राष्ट्रिय एकता दिवसलाई राष्ट्रव्यापी बनाउनका लागि जनस्तरबाट सरकारलाई व्यापक दबाब दिनपर्नेमा उनले जोड दिए । उनले भने, ‘यो देशको राष्ट्रपति विद्यादेवी भण्डारी तथा प्रधानमन्त्री केपी शर्मा ओली पनि एकीकृत नेपालको राष्ट्रपति र प्रधानमन्त्री हुन । पृथ्वीनारायण शाहले एकीकरण नगरिदिएको भए देश पनि रहने थिएन। उहाँहरू पनि नेपालको राष्ट्रपति र प्रधानमन्त्री बन्न सक्नुहुन्नथ्यो।’ नेता लिङदेनले कतिपय विरोधीहरूले पृथ्वीनारायण शाहबारेको टिप्पणीको कुनै तुक नरहेको बताए। उनले भने, ‘पछिल्ला राजनीतिक गतिविधिले नेपालको पहिचान हराउन थालेको छ। भाषा, राष्ट्रिय झण्डा तथा राष्ट्रिय जनावर परिवर्तन गर्ने प्रयास भए। हिन्दुराष्ट्रको पहिचान त समाप्त पारे।’

तपाईको प्रतिक्रिया