ईटहरी । बुढासुब्बा मन्दिर भन्ने बित्तिकै मानिसहरुमा एक किसिमको श्रद्धाभाव उत्पन्न हुन्छ । बुढासुब्बालाई सम्झिए मात्र पनि धेरै मनोकाँक्षा पुरा हुन्छ भन्ने जनबिश्वास रहेको छ । सुनससरीको धरानमा रहेको बुढासुब्बा त धेरैलाई थाह छ तर सुनससरीको ईटहरी उपमहानगरपालिका २ मा पनि बुढासुब्बा मन्दिर छ भन्ने धेरै कम मानिसहरुलाई थाह छ ।

ईटहरी २ तालतलैयाको छेऊमा रहेको बुढासुब्बा मन्दिरमा पछिल्लो समय दर्शनार्थीहरुको घुँईचो लाग्न थालेको छ । बि.स २०५५ सालदेखि सो स्थानमा बुढासुब्बाको मन्दिर स्थापना भएको हो । सो मन्दिरमा पुजापाठ गर्दा,भाकल गर्दा मनोकाँक्षा पुरा हुने जनबिश्वास बढेको छ ।

यसरी स्थापना भयो बुढासुब्बा मन्दिर

सो स्थानमा बुढासुब्बा उत्रिएको स्थानीयले थाह पाएपछि स्थानीय बासीहरुले पुजापाठ शुरु गरे । पछि जनबिश्वास बढदै गयो । स्थानीयले नगरपालिका गुहारे । त्यसपछि नगरपालिकाले टिन र स्थानीय सामुदायिक बन समुहले काठ दिएपछि सो मन्दिर निर्माण गरिएको पुजारी डम्बरबहादुर मगर बताउँछन । हाल सो मन्दिरमा औँसी र एकादशी बाहेक हरेक दिन पुजा गर्नेको भिड हुने गरेको छ ।

सो मन्दिरमा छोराछोरी नहुने,बिदेशमा भएकाहरु र कुनै काम पुरा होस भनि भाकल गर्नेको भिड नै लाग्ने गरेको छ । सोही मन्दिरमा भाकल गर्दा मनोकाँक्षा पुरा समेत हुने गरेको पुजारी मगर बताउँछन । सोही मन्दिरमा सुँगुर,कुखुरा लगायत दुईखुट्टे र चार खुट्टे पशु चौपाया भाकल गरी चढाउने गरिएको मगर बताउँछन ।

तपाईको प्रतिक्रिया