चन्दन रौनियार सुनसरी बैशाख २४ / शनिबार सम्पन्न नेपाल पत्रकार महासंघ प्रदेश नम्बर १ निर्वाचनका क्रममा बुथ क्याप्चर भएको स्वतन्त्र तथा समावेशी प्यानलले आरोप लगाएको छ । आइतबार प्यानलका तर्फबाट संयुक्त विज्ञप्ति जारी गर्दै बुथ क्याप्चर गरिएको बारे निष्पक्ष छानबिनको माग गरिएको छ । सङ्घीय प्रेस फोरमका केन्द्रीय सल्लाहकार गोपाल देवान, सङ्घीय पत्रकार युनियनका केन्द्रीय संयोजक दिलकुमार लावती, स्वतन्त्र पत्रकार संघका संयोजक विजय खतिवडा, मधेसी पत्रकार समाजका केन्द्रीय सदस्य श्यामसुन्दर सुतिहार र प्रेस मञ्च नेपालका प्रदेश १ संयोजक चन्दन रौनियारले हस्ताक्षर गरेको विज्ञप्तिमा ताप्लेजुङ, तेह्रथुम, खोटाङ, संखुवासभा, उदयपुर र सोलुखुम्बुमा तीन संगठन आबद्ध गठबन्धनले चुनावी धाँधली गरेको आरोप लगाएका हुन् । देवान, खतिवडा र सुतिहार समावेशी प्यानलबाट क्रमशः अध्यक्ष, उपाध्यक्ष र मधेसी सदस्य पदका प्रत्यासी पनि थिए । विभिन्न ६ वटा जिल्लाहरुमा आफ्ना प्रतिनिधिहरुको रोहबर बिना नै निर्वाचन गतिविधि गरेको, महासंघ केन्द्रबाट खटिएका प्रतिनिधि, निर्वचन समितिमा रहेका पदाधिकारी र सुरक्षाकर्मीसमेतको मिलेमतोमा विदेश गएकादेखि जिल्ला बाहिर रहेर काम गरिरहेका पत्रकारहरुको समेत शतप्रतिशत मत हालिएको भन्दै निन्दा गरिएको छ । ती जिल्लामा भएको चुनावी धाँधलीको निष्पक्ष छानबिन गरेर सत्यतथ्य बाहिर ल्याउन पनि समावेशी प्यानले महासंघ केन्द्रलाई चुनौती दिएको छ । लोकतन्त्रमा निर्वाचनको महत्वपूर्ण भूमिका रहने भन्दै समावेशी प्यानलले आफूहरुको उम्मेद्वारीका कारण निर्वाचन सम्पन्न भएकोमा भने सन्तोष व्यक्त गरेको छ । साथै, ओखलढुङ्गा, पाँचथर, धनकुटा, सुनसरी, मोरङ, भोजपुर, झापा र इलाममा भएको निष्पक्ष निर्वचन र त्यसबाट प्राप्त मत परिणामलाई स्वीकार्दै समावेशी प्यानले अन्य ८ जिल्लामा खसेको मतका आधारमा प्रेस चौतारी, प्रेस युनियन र प्रेस सेन्टर सम्मिलित गठबन्धनले अधिक मत ल्याएको भन्दै सो प्यानलका उम्मेद्वारहरुलाई विज्ञप्तिमार्फत बधाइ र शुभकामना पनि व्यक्त गरेको छ । नेपाल पत्रकार महासंघ केन्द्रीय निर्वाचन समितिले भने आइतबार नै अन्तिम मत परिणाम सार्वजनिक गरेर संयुक्त गठबन्धनका उम्मेद्वारहरु विजयी भएको घोषणा गरेको छ । जारी मत परिणाम अनुसार बिक्रम लुइटेल नेतृत्वको प्यानले सबै २१ पदमा विजय हासिल गरेको हो । जसमध्ये अध्यक्ष, उपाध्यक्ष, महिला उपाध्यक्ष, महासचिव, समावेशी सचिव, खुल्ला सदस्य र मधेसी सदस्य पदका लागि निर्वाचन भएको थियो भने सचिव, कोषाध्यक्ष, महिला सदस्य, आदिवासी जनजाति सदस्य, दलित सदस्य र अल्पसंख्यक सदस्यका लागि निर्विरोध भएको थियो

तपाईको प्रतिक्रिया